Allaffimmi ikiortitut atorfeqarnermit nunap immikkoortortaani pisortanngorneq
Atorfeqarluarumallutit Nuummi najugaqartariaqanngilatit. Henriette ilaquttanilu Nanortalimmiuupput, Henriettelu Kujataani nunap immikkoortortaani Pilersuisup pisiniarfiinut tamanut pisortaalluni.
Henriette nunaqarfeeqqami Alluitsup Paani peroriartorpoq, inuunermilu annersaa najorsimallugu. Inooqatini Benjamin qitornatillu sisamaasut 2018-imi Nanortalimmut nuupput – nuannareqaalu.
”Nunamut peroriartorfinnut, ilaquttannut, ikinngutinnut pinngortitatsinnullu suli atasorujussuuvunga. Kujataa angerlarsimaffigigakku maaniissallunga toqqarpara. Maani inuulluataarlutalu inuunerput isumaqarluaqaaq. Angalasimatillunga angerlaraangama qamuuna kissalaarneq misigisarpara. Inuuninni allamut nuussimannginnama unittoorsimassasunga ilaat immaqa eqqarsarput. Nammineerlunga taamatut isiginngilara. Kujataa angerlarsimaffigaara. Ilutigaluguli ineriartornissara, pikkorissarnissaralu pisariaqartilluinnarpara.”
Henriettep meeqqat atuarfia naammassigamiuk Qaqortumi NI-mi atuarpoq, allaffimmilu ikiortitut 2004-mi allagartartaarluni.
Ukiuni pingasuni siullerni ilaatigut timelærertitut, aalisakkerivimmi, Alluitsup Paanilu kommunip allaffiani allaffimmi ikiortitut sulivoq. Ilutigalugu ukkatarisaminik ilaqutaqalerpoq.
”2007-imi Pilersuisumi allaffimmi ikiortitut atorfinippunga. Allaffimmi ikiortitut suliassakka, nunaqarfimmilu pisiniarfimmi ulluinnaat piffissaq siulleq sungiusarpakka. Taassumap kingorna suliassanik nutaanik misileerusulerpunga, allaffimmiillu pisiniarfimmut nuullunga. Atortussaarniarfitsinni ikiortitut aallartippunga, kingornalu atortussaarniarfik akisussaaffigilerlugu. Atorfik taanna uannut tulluarnerugami! Pisiniartartut naapissallugit sullisissallugillu nuannarigakku. Pisiniarfipput qanoq pitsanngorsassanerlugu suleqatikka peqatigalugit pilersaarusiornissaanut aamma kajumilerpunga.”
KNI-p niuertunngorniarnermut aaqqissuussaanut Henriette 2017 – 2018-imi peqataavoq, ilaquttanilu ilagalugit Nanortalimmut nuullutik, ukiunilu sisamani pisiniarfimmi pisortaalluni. Aqutsisunngorniarnermut ilinniarneq KNI-p aaqqissuussaa aamma ilinniarfigaa. Kujataani Pilersuisup pisiniarfiini ullumikkut nunap immikkoortortaani pisortatut atorfeqarpoq.
”Oqariartuutigerusutara tassaavoq, illoqarfiit pingaarnersaata avataani najugaqarusukkaluaraanniluunniit, inuit nalinginnaasut suliffigissaarnissaannut KNI-p iluani atorfiit assigiinngitsut periarfissaqartitsimmata. Suliffeqarfiup iluani ilinniarneqarsinnaasut sulisunut angusaqarluarniartartunut Nunatsinni sumiikkaluaraanniluunniit suliffeqarnissamut aamma periarfissiipput. Uannut ilaquttannullu iluaqutaasimaqaaq – taamatullu isumaqarpunga Nunatsinnut aamma iluaqutaasoq.”
